【半透明波Boot：X Ghosted. 1 AG 實測】
.
球場又封場，「屎波裝備多」又要重回有限度嘅運作。呢段時間，阿靴會盡能力，繼續同大家講吓波Boot以及有關香港足球嘅事情，再次感謝你地一路嘅支持。
.
好，講返今日嘅正題先。
.
三間今年就Upgrade咗旗下速度型嘅選擇X系列， 而今代個名就更加轉咗，叫做X Ghosted。一個咁得意嘅名，難道三間期望將X做到如Ghost一樣，介乎响睇到同睇唔到之間？X Ghosted系列嘅第一對Boot就屬於Inflight Pack， 用上受歡迎嘅白色配以簡單嘅黑色同金色線條。至於今次實測，阿靴測試嘅係X Ghosted.1 AG，佢係一對有鞋帶嘅仿真草專用波Boot。話說阿靴將X Ghosted.1 AG拎上手時，就已經覺得佢同以往嘅X都幾唔同下，原因係佢嘅表層係半透明，而摸落嘅質感亦非常之薄。經過多次嘅實測，今次阿靴就同大家認真講講佢嘅發揮。
.
X Ghosted.1鞋面用上Fluroskin嘅科技，佢由一塊網面配以一層透明嘅膠組成，佢摸落個質感雖然屬於薄，不過佢具有適量嘅硬度。X Ghosted.1係一對有鞋帶嘅波Boot，同時具備襪套式設計，令波Boot與腳背更為貼腳；至於鞋口位置，X Ghosted.1 同樣刻意做得較薄，期望俾到大家更高嘅靈活度及速度感，而佢嘅鞋內踭位置，佢亦有兩塊海綿微微突出，期望帶俾大家更強嘅Lockdown。鞋釘上面，實測用嘅波Boot係AG釘底，釘會較FG短及密，方便大家於仿真草場上踢球。
於數次實測上，阿靴最滿意係X Ghosted.1嘅貼腳質感，畢竟今次三間就講到明對Boot係帶俾大家Vaccum Fit，啫係非常貼腳嘅體驗。佢令阿靴諗起舊時Vapor 11嘅貼腳感覺，不過當然佢鞋型上有無Vapor 11咁尖。X Ghosted.1嘅貼腳感令踢球嘅速度感同靈活感都變得更強，鞋口位內側我會覺得佢設計得較低，初時會覺得唔係好習慣，不過著耐咗就覺得唔係一個大問題，反而令整個盤扭感覺更為靈活。此外，阿靴亦喜歡佢鞋內踭位置嘅突出海綿設計，加埋鞋帶，著落嘅Lockdown相當唔錯。不過X Ghosted.1 AG 嘅重量唔算非常輕巧，畢竟AG釘底嘅用料相對以往嘅FG釘會唔同，因而較重。
.
阿靴亦非常滿意X Ghosted.1嘅射門質感，因為鞋面薄得嚟有一定硬度，加上AG版本會帶點重量，會係幾容易做一啲食得應嘅射門，漂嘅波亦同樣較容易做到。同樣地X Ghosted.1鞋面無咩特別紋理，所以佢唔會好似Predator Mutator 20+般帶來好強嘅磨擦力，X Ghosted.1腳內檔射門佢唔會話好西，不過就會傾向急勁。
.
短傳上X Ghosted.1會較爽朗，質感亦會較清脆，因為佢鞋面嘅關係，力量亦會算強。至於長傳上，力量感同樣豐富，雖然佢鞋面較平滑，唔會話特別提升到長傳嘅球感，不過整體嚟講，阿靴覺得佢長傳嘅發揮屬於中上。至於控球上，阿靴就覺得一般般，始終鞋面會較為平滑，控球球感唔會話突出，不過佢會俾到大家一個非常貼腳嘅控球體驗。
.
舒適度上，阿靴就認為X Ghosted.1以非真皮波Boot嘅類別嚟講，佢係算唔錯嘅，畢竟波Boot係合適阿靴嘅腳形。佢設計相當貼腳但又唔會帶來任何刮腳嘅狀況，可以話係一對相當理想嘅速度型波Boot。於AG釘底嘅設定上，阿靴認為佢合適香港大部份嘅仿真草地，畢竟佢鞋釘會較短而且密，抓地力上亦會啱啱好。
.
至於Size上，阿靴認為X Ghosted.1 AG無偏大或者偏細，阿靴平時著開US8，選擇翻US8就會啱啱好。至於鞋型上，阿靴認為佢會較為合適中之窄腳嘅波友。
.
Adidas X Ghosted.1 AG 實測報告：
盤球：●●●●◐
控球：●●●
短傳：●●●●
長傳：●●●●
射門：●●●●●
舒適：●●●◐
保護：●●●
.
感謝 Adidashk 提供嘅波Boot。
.
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas Top Sala Lux: https://youtu.be/R7Win_I5PQw
【波Boot實測】白飯魚: https://youtu.be/-dbvs0_YgiY
【波Boot比較】五對驚喜釘Boot: https://youtu.be/vzDRe25kkrM
Search